డాక్టర్ బి.ఆర్. అంబేద్కర్ కోనసీమ జిల్లా – ముమ్మిడివరం నియోజకవర్గం
ఐ. పోలవరం, అక్టోబర్ 28: ఐ. పోలవరం మండల పరిధిలోని 216వ జాతీయ రహదారిపై భారీ చెట్లు కూలిపోవడంతో సుమారు కిలోమీటరు మేర ట్రాఫిక్‌కు అంతరాయం ఏర్పడింది. రహదారిపై చెట్లు అడ్డంగా పడటంతో వాహనాల రాకపోకలు నిలిచిపోయి వాహనదారులు ఇబ్బందులు ఎదుర్కొన్నారు.
ఎస్సై రవీంద్రబాబు తక్షణ స్పందన
సమాచారం అందుకున్న ఐ. పోలవరం ఎస్సై రవీంద్రబాబు వెంటనే స్పందించి పోలీసు సిబ్బందితో సంఘటనా స్థలానికి చేరుకున్నారు. పరిస్థితిని పరిశీలించి, రహదారిపై పడిన భారీ చెట్లను తొలగించేందుకు జేసీబీ, కట్టర్ మిషన్ల సహాయంతో యుద్ధప్రాతిపదికన చర్యలు చేపట్టారు.
ట్రాఫిక్ క్లియర్.. వాహనదారులకు ఊరట
పోలీసుల సమన్వయంతో రహదారిపై ఉన్న చెట్లను తొలగించి వాహనాల రాకపోకలను పునరుద్ధరించారు. ట్రాఫిక్‌కు అంతరాయం కలగకుండా ఎస్సై రవీంద్రబాబు ఆధ్వర్యంలో పోలీసులు తక్షణ చర్యలు చేపట్టారు. పోలీసుల వేగవంతమైన స్పందనతో వాహనదారులకు ఊరట లభించింది.
