ఐ . పోలవరం కోనసీమ, అక్టోబర్ 6 (జీఎస్‌బీ వార్త, రిపోర్టర్ వేణు కాశి): రైతుల సమస్యల పరిష్కారం కోసం అక్టోబర్ 6న నిర్వహించనున్న ఛలో విజయవాడ కార్యక్రమానికి రైతులు పెద్ద సంఖ్యలో తరలిరావాలని భారతీయ కిసాన్ సంఘ్ కోనసీమ శాఖ పిలుపునిచ్చింది. పగలు, రాత్రి, ఎండ, వానను లెక్కచేయకుండా ప్రజలకు అన్నం పండించే రైతుల సమస్యలపై ప్రభుత్వాలకు కనువిప్పు కలిగించాల్సిన అవసరం ఉందని సంఘం పేర్కొంది.
రైతులకు తగినంత ఎరువుల సరఫరా చేయాలని, ధాన్యానికి లాభసాటి ధర కల్పించాలని సంఘం డిమాండ్ చేసింది. ఉద్యాన పంటలకు ఉపాధిహామీ పథకాన్ని అనుసంధానం చేయాలని, పగటిపూట నాణ్యమైన విద్యుత్‌ను 9 గంటలు అందించాలని కోరింది.
పశుపోషణను ప్రోత్సహించేందుకు పశువుల దాణా ఖర్చులకు ఆర్థిక సహాయం అందించాలని, తెలంగాణ తరహాలో రైతులకు ఎకరాకు పంట సాయం అందించాలని, వ్యవసాయ పరపతి సంఘాల ద్వారా లక్ష రూపాయల వరకు జీరో వడ్డీ రుణాలు అందించాలని డిమాండ్ చేసింది.
ఆరవ తరగతి నుంచే స్కిల్ విద్యలో వ్యవసాయం, పశుపోషణను చేర్చాలని, ప్రకృతి వైపరీత్యాల కారణంగా పంటలు దెబ్బతిన్నప్పుడు రైతులకు తగిన నష్టపరిహారం అందించాలని కోరింది. ఎల్‌నినో, అధిక వర్షాలు, పంటలు కుళ్లిపోవడం, గోదాముల కొరత వంటి కారణాలతో పంట నష్టపోయినప్పుడు రైతును బాధ్యుడిని చేయడం సరికాదని సంఘం పేర్కొంది.
పంట నష్టంపై సర్వే నంబర్ల ఆధారంగా పరిహారం అందించాలని, తగినన్ని నాట్లు, కోత యంత్రాలను సబ్సిడీపై అందించాలని డిమాండ్ చేసింది. ఉద్యోగులకు వివిధ సందర్భాల్లో ప్రభుత్వాలు సౌకర్యాలు కల్పిస్తున్నట్లే రైతుల సమస్యలను కూడా పరిగణనలోకి తీసుకోవాలని కోరింది.
రైతులు పండించిన పంటకు గిట్టుబాటు ధర, ఉత్పత్తి వ్యయానికి తగిన రక్షణ, ప్రకృతి వైపరీత్యాల సమయంలో నష్టపరిహారం వంటి అంశాలపై ప్రభుత్వాలు స్పష్టమైన చర్యలు తీసుకోవాలని భారతీయ కిసాన్ సంఘ్ కోనసీమ శాఖ కోరింది. రైతుల డిమాండ్లను ప్రభుత్వ దృష్టికి తీసుకెళ్లేందుకు ఛలో విజయవాడ కార్యక్రమానికి రైతులు, వ్యవసాయ కార్మికులు పెద్ద సంఖ్యలో తరలిరావాలని పిలుపునిచ్చింది. ఈ కార్యక్రమంలో కిసాన్ సంఘ జిల్లా ఉపాఅధ్యక్షులు వేగిరాజు సూర్య నారాయణ రాజు కిసాన్ సంఘ సభ్యులు రాచకొండ మాణిక్యలారావు సాగిరాజు బాపిరాజు దాట్ల నరసింహ రాజు పొత్తూరి వెంకటేశ్వర రాజు పెమ్మిరెడ్డి రమేష్ రాయపురెడ్డి చిట్టిబాబు దంగుడు బియ్యం మోహన్ పలువురు కిసాన్ సంఘ సభ్యులు కలసి ఐ పోలవరం మండలం నుంచి చలో విజయావాడా బయలుదేరారు
